27.11.2020

Журналістам Магілёўскай вобласці ўручаны ўзнагароды на з’ездзе БСЖ

XIV з’езд грамадскай арганізацыі «Беларускі саюз журналістаў» адбыўся сёння ўфармаце відэаканферэнцыі праз сітуацыю з каранавірусам. Удзел у ім прынялі дэлегаты з усіх абласцей краіны.

З’езд праходзіў актыўна, дынамічна і па-дзелавому. Дэлегаты заслухалі справаздачны даклад старшыні праўлення БСЖ Андрэя Крывашэева. У спрэчках ўдзельнікі з’езду гаварылі аб ролі СМІ ў сучасным грамадстве, грамадзянскай і маральнай пазіцыі журналіста, дзяліліся вопытам работы, уносілі прапановы па ўдасканаленні работы рэдакцый, журналісцкай супольнасці. У прыватнасці, старшыня Магілёўскай абласной арганізацыі БСЖ Святлана Шутава ў сваім выступе закранула тэму павышэння ўзроўню прафесійнай падрыхтоўкі журналістаў. З гэтай мэтай у Магілёўскай вобласці праводзяцца форумы маладых журналістаў, семінары, у працэсе навучання, перадачы вопыту шырока выкарыстоўваецца настаўніцтва. З улікам развіцця інтэрнэт-журналістыкі Святлана Шутава прапанавала праводзіць сумесна з БСЖ серыі навучальных трэнінгаў з запрашэннем кантэнт-менеджараў і іншых спецыялістаў. Дарэчы, у межах правядзення Дня беларускага пісьменства ў Бялынічах быў праведзены конкурс на самае лепшае асвятленне тэматыкі свята, у якім разам з журналістамі актыўны ўдзел прынялі і блогеры.

Дэлегаты з’езда абралі новы склад праўлення БСЖ, сакратарыяту, камітэта па прэміях і прафесійнай этыцы журналіста. Старшынёй праўлення БСЖ перавыбраны Андрэй Крывашэеў. З’езд таксама прыняў дэкларацыю ў падтрымку ўнутранай і знешняй палітыкі, накіраванай на ўмацаванне незалежнасці краіны, інстытутаў прававой дзяржавы, паляпшэнне якасці жыцця беларускага народа.

Падчас з’езда найлепшыя журналісты атрымалі ўзнагароды БСЖ. Пасведчанне аб прысуджэнні ганаровага звання БСЖ «Заслужаны журналіст»і нагрудны знак былі ўручаны рэдактару раённай газеты «Зара над Друццю» Міхаілу Карпечанку, дыплом лаўрэата прэміі БСЖ за найлепшую журналісцкую працу – спецыяльнаму карэспандэнту ІА «Магілёўскія ведамасці» Генадзю Корсакаву.

Геннадий Александров, mogilevnews.by