04.06.2025

Юрый Назараў: у Бабруйскай фабрыкі мастацкіх вырабаў вялікі патэнцыял для росту аб'ёмаў вытворчасці

У Бабруйскай фабрыкі мастацкіх вырабаў ёсць вялікі патэнцыял для планамернага росту аб'ёмаў вытворчасці і павышэння эканамічнай эфектыўнасці. Такое меркаванне выказаў кіраўнік спраў Прэзідэнта Беларусі Юрый Назараў у час наведвання прадпрыемства, паведамілі БЕЛТА ў Кіраўніцтве справамі.

На парадку дня сёння разгляд пытанняў пашырэння відаў дзейнасці і нарошчвання аб'ёмаў вытворчасці як непасрэдна Бабруйскай фабрыкі мастацкіх вырабаў, так і іншых прадпрыемстваў, якія ўваходзяць у дзяржаўнае вытворча-гандлёвае аб'яднанне "Белмастацпромыслы" Кіраўніцтва справамі Прэзідэнта. Актуальнай задачай для вытворцаў вырабаў народных мастацкіх рамёстваў з'яўляецца не толькі захаванне традыцыйных народных промыслаў шляхам вытворчасці адпаведнай прадукцыі - сувеніраў, аксесуараў, прадметаў мастацтва, побыту, адзення, швейных вырабаў, але і забеспячэнне загрузкі вытворчых магутнасцей за кошт развіцця дадатковых відаў дзейнасці.

Так, Бабруйская фабрыка мастацкіх вырабаў нараўне з вытворчасцю прадукцыі народных рамёстваў даволі паспяхова развіла такі напрамак дзейнасці, як металаапрацоўка. З 2007 года на прадпрыемстве адкрыты новы від вытворчасці - мастацкая коўка. Асартымент вырабаў папоўніўся рознымі каванымі вырабамі: рашоткамі, агароджамі, дзвярнымі казыркамі, кветачніцамі, мэбляй з элементамі коўкі, дэкаратыўнымі вырабамі з металу і інш.

Спецыялісты фабрыкі выпускаюць як традыцыйныя вырабы з металу, так і эксклюзіўныя па спецыяльных заказах. Работы майстроў Бабруйскай фабрыкі мастацкіх вырабаў упрыгожваюць знакавыя аб'екты ў краіне. Рукамі майстроў менавіта гэтай фабрыкі таксама выраблены вымпелы "За мужнасць і стойкасць у гады Вялікай Айчыннай вайны".

Цяпер разглядаецца пытанне аб далейшым пашырэнні відаў дзейнасці прадпрыемства. У прыватнасці, прапрацоўваюцца магчымасці арганізацыі дрэваапрацоўчай вытворчасці, арыентаванай на выпуск запатрабаванай прадукцыі глыбокай перапрацоўкі з высокай дабаўленай вартасцю.

Як адзначыў Юрый Назараў, рэгіён мае добрую сыравінную базу для дрэваапрацоўкі, транспартную інфраструктуру і прафесійныя кадры. Ёсць і неабходныя вытворчыя пляцоўкі, на якіх можна арганізаваць работу. Для Бабруйскай фабрыкі мастацкіх вырабаў, а таксама для іншых прадпрыемстваў ДВГА "Белмастацпромыслы" новыя напрамкі дзейнасці - гэта крок наперад. Неабходна развівацца ў тых сферах эканомікі, якія забяспечаць стабільную загрузку вытворчасці і будуць эфектыўныя як у бягучай, так аддаленай перспектыве, падкрэсліў кіраўнік спраў Прэзідэнта.

Бабруйская фабрыка мастацкіх вырабаў спецыялізуецца на вытворчасці гатовых тэкстыльных вырабаў, вязанай і трыкатажнай прадукцыі, вырабаў з дроту і гатовых металічных вырабаў. У першым квартале бягучага года прадпрыемствам забяспечаны тэмп росту аб'ёмаў вытворчасці 126,5 працэнта. Амаль на 28 працэнтаў павялічана заработная плата работнікаў. Іх на фабрыцы працуе каля 120 чалавек.

БелТА