17.06.2021

У Магілёўскай вобласці травы першага ўкосу скошаны на плошчы амаль 75%

У Магілёўскай вобласці травы першага ўкосу скошаны на плошчы амаль 75%. Пра гэта паведаміла начальнік аддзела раслінаводства камітэта па сельскай гаспадарцы і харчаванні Магілёўскага аблвыканкама Лілія Гулінская.

«У гэтым годзе мы пачалі ўборку траў крыху раней, узялі добры тэмп. На сённяшні дзень ужо скошана 74% траў першага ўкосу. Прыбрана з плошчы больш за 110 тыс. га – 77% ад скошанага. Гэта ў два разы вышэй у параўнанні з узроўнем мінулага года», – адзначыла Лілія Гулінская.

Зараз у рэгіёне нарыхтавана 194,6 тыс. т кармавых адзінак – гэта 14% ад задання. «Да ўзроўню мінулага года гэты паказчык склаў 117%. На ўмоўную галаву жывёлы нарыхтавана 5 ц кармавых адзінак, што на 2,2 ц больш, чым у 2020 годзе», – падкрэсліла начальнік аддзела раслінаводства.

Па словах Ліліі Гулінскай, травы сёлета выраслі добрыя, зараз галоўная задача – якасна і своечасова праводзіць уборку. «За якасцю кармавых траў сочыць ветэрынарная служба, адбіраюць узоры і правяраюць іх. Сочаць за якасцю трамбаўкі, унясеннем кансервантаў – цалкам адсочваюць тэхналогію. Ад якасці травяністых кармоў напрамую залежыць якасць і колькасць малака», – падагульніла Лілія Гулінская.

Травы першага ўкосу ў Магілёўскай вобласці неабходна ўбраць да 20 чэрвеня. Работы па нарыхтоўцы травяных кармоў у вобласці будуць працягвацца да кастрычніка.

Магілёўскі абласны выканаўчы камітэт