13.11.2020

У Асіповічах на стадыёне «Лакаматыў» адкрылі новую спартпляцоўку

Жыхары горада ўжо паспелі прывыкнуць, што ў апошнія некалькі месяцаў Асіповічы пастаянна абнаўляюцца, рэгулярна з’яўляюцца новыя аб’екты, нешта змяняецца і пераўтвараецца. Не засталіся ў баку ад «добраўпарадкавальных» павеваў і мясцовыя спартсмены.

Каля года таму пачаліся абмеркаванні таго, што ж будзе з «Лакаматывам». Спартыўны аб’ект знаходзіцца практычна ў цэнтры горада, аднак яго інфраструктура пакідала жадаць лепшага. Але, нягледзячы на некаторую неўладкаванасць, наведвальнікі там усё ж з’яўляліся. Аднак, каб надаць аб’екту належны ўзровень, неабходна было правесці пэўныя будаўніча-рэстаўрацыйныя работы.

Ужо ў пачатку цёплага сезона-2020 яны і пачаліся. Першым падвергнулася рэканструкцыі футбольнае поле: там правялі хімпраполку, рэкультывацыю, фрэзаванне, падрыхтоўку і закладку верхняга пласта глебы і ў завяршэнне пасеялі спецыяльны спартыўны газон. У поўным жа аб’ёме работы на полі завершацца толькі вясной наступнага года: працэс гэты няхуткі.

Змянілі і глухую бетонную агароджу на больш сучасную з высокай ступенню святлопранікальнасці. Таксама летам каля поля з’явіліся новыя трыбуны гледачоў на 124 чалавекі.

На жаль, пазбавіўся стадыён адной са сваіх «фішак» – пляцоўкі для гульні ў гарадкі. Аднак яе не знішчылі незваротна! Па дамоўленасці з аматарамі гэтай гульні і нават пад іх непасрэдным кантролем гульнявая зона пераехала на стадыён «Алімпіец».

Асаблівую ўвагу надалі ўзвядзенню новай спартыўнай пляцоўкі на месцы баскетбольнага поля. Памер спартыўнага збудавання – 40х20 метраў. Дарэчы, пляцоўка атрымалася ўніверсальная: цяпер там можна гуляць у баскетбол, міні-футбол і валейбол. Спецыяльнае пакрыццё з гумовай крошкі не баіцца ўздзеяння ападкаў, пылу і сонца, устойлівае да пашкоджанняў і дэфармацыі, а таксама траўмабяспечнае і экалагічнае.

Літаральна ў гэтую пятніцу на «Лакаматыве» правялі цырымонію ўрачыстага адкрыцця стадыёна ў цэлым і новага шматфункцыянальнага аб’екта ў прыватнасці. Сярод ганаровых гасцей – старшыня Асіповіцкага райвыканкама Канстанцін Жыгуцкі і начальнік упраўлення спорту і турызму Магілёўскага аблвыканкама Сяргей Новікаў. Таксама на мерапрыемстве прысутнічалі кіраўнікі і прадстаўнікі спартыўных арганізацый, спартсмены-аматары і жыхары Асіпоўшчыны. Канстанцін Аляксандравіч і Сяргей Валянцінавіч звярнуліся да прысутных з прывітаннямі і віншаваннямі, а ад усіх спартсменаў падзяку выказаў дырэктар мясцовай дзіцяча-юнацкай спартшколы Аляксандр Смалякоў. Апошняму ўручылі гульнявыя мячы і сертыфікат на Br2 тыс. для набыцця спартыўнага інвентару і абсталявання.