29.05.2020

Швейныя і трыкатажныя прадпрыемствы Магілёўшчыны нарошчваюць экспарт

Швейныя і трыкатажныя прадпрыемствы Магілёўшчыны нарошчваюць экспарт. Пра гэта паведамляе афіцыйны сайт «Беллегпрама».

У першым квартале гэтага года экспарт прадпрыемстваў трыкатажнай галіны, якія ўваходзяць у структуру «Беллегпрама», склаў 36,5 мільёна долараў ЗША (108,4% да аналагічнага перыяду мінулага года). Аб’ём экспарту на ўзроўні такога ж перыяду 2019 года і вышэй паказалі ў ліку іншых прадпрыемствы Магілёўшчыны: ЗАТ «Вяснянка» (125%) і ААТ «Бабруйсктрыкатаж» (225%).

«Пашыраецца геаграфія паставак: прадукцыя прадпрыемстваў трыкатажнай галіны ў I квартале 2020 года экспартавалася ў 20 краін (у 2019-м – у 18). Выраслі пастаўкі ў Расію, Германію, Малдову, Польшчу, Азербайджан, Літву і Латвію. Па шэрагу краін экспарт узрос у разы. Адгрузкі трыкатажнай прадукцыі ў Казахстан павялічыліся ў 2,6 разы, ва Узбекістан – у 3,2», – адзначаецца ў паведамленні.

Пастаўкі швейных вырабаў ва Узбекістан выраслі больш чым у 9 разоў, Кыргызстан – больш чым у 3 разы, Вялікабрытанію – у 2,4 раза.