16.07.2020

Паўтара дзясятка выпускнікоў каледжа чакаюць у ліпені на «Бабруйскаграмашы»

Холдынг «Бабруйскаграмаш» выпускае больш за 150 найменняў прадукцыі і шмат мадыфікацый, каб была магчымасць аператыўна рэагаваць на патрабаванні любога рынку. Сучасныя тэхналогіі высокай дакладнасці дазволілі перайсці ад буйнасерыйнай да дробнасерыйнай вытворчасці.

Сярод актуальных распрацовак – бочкі для ўнясення вадкіх угнаенняў ёмістасцю ад 3-х да 20-ці тон. Бабруйская тэхніка працуе больш чым у 50 краінах. У апошнія гады да традыцыйных партнёраў – Расіі, Казахстана, Украіны – дадаліся новыя: скандынаўскія, балканскія і афрыканскія краіны, В’етнам.

Толькі ў ліпені на асноўнай пляцоўцы холдынгу аб’ём вытворчасці чакаецца ў раёне $ 7 млн. і амаль уся прадукцыя ўжо аплачана пакупнікамі. Задача на будучы год – павелічэнне долі экспарту ў агульным аб’ёме продажаў з 50% да 70%.

Зараз прадпрыемства загружана ў поўным аб’ёме, працуе ў тры змены і пастаянна адпраўляе тэхніку спажыўцам. Заказаў столькі, што паўстаў дэфіцыт рабочых рук. Ужо ў ліпені тут чакаюць паўтара дзясятка маладых людзей – выпускнікоў мясцовага каледжа.