15.12.2020

Моладзь Магілёўскай вобласці прадставіла на конкурс фатаграфій-матыватараў больш за 550 работ

Моладзь Магілёўскай вобласці прадставіла на конкурс фатаграфій-матыватараў «Дом наш, ласкаю сагрэты» больш за 550 работ. Пра гэта паведаміла загадчык аддзела па ўзаемадзеянні з дзіцячымі і моладзевымі грамадскімі арганізацыямі ДУДА «Абласны цэнтр творчасці» Алена Кавалёва.

Творчае спаборніцтва праводзілася сярод навучэнцаў устаноў агульнай сярэдняй і дадатковай адукацыі дзяцей і моладзі рэгіёна ў 4 намінацыях: «Духоўна-культурная спадчына Беларусі», «Чалавек і яго справа», «Партрэт сучасніка» і «Прырода Беларусі».

«Цікавасць навучэнцаў і высокая якасць пададзеных работ сведчаць аб тым, што маладое пакаленне вобласці расце з трапяткім стаўленнем да сваёй малой радзімы, людзей, якія іх акружаюць, а беражлівае стаўленне да прыроды і жывёл, перададзенае з дапамогай фатаграфіі, дэманструе высокае духоўна-маральнае выхаванне дзяцей», – адзначыла суразмоўца.