25.06.2020

Мінсувязі выпусціць ў абарот паштовую марку «Шклоў» з серыі «Гарады Беларусі»

Міністэрства сувязі і інфарматызацыі 28 чэрвеня выпусціць ў абарот паштовую марку «Шклоў» з серыі «Гарады Беларусі», паведамілі ў прэс-службе РУП «Белпошта».

Дызайн маркі распрацавала Яўгенія Бядонік. Тыраж складзе 36 тыс. Памер маркі – 52х29,6 мм. У лісце шэсць (2х3) марак. Памер ліста – 130х120 мм.

Марка друкавалася ў РУП «Выдавецтва “Беларускі Дом друку”».

Намінал M адпавядае тарыфу на перасылку міжнароднай простай паштовай прыярытэтнай карткі.

У дзень выпуску паштовай маркі ў абарот у аддзяленні паштовай сувязі № 4 Шклова Магілёўскай вобласці будзе праводзіцца спецыяльнае гашэнне на канверце «Першы дзень».

Шклоў – горад Магілёўскай вобласці, адміністрацыйны цэнтр Шклоўскага раёна. Размешчаны на правым беразе ракі Днепр. Упершыню ў пісьмовых крыніцах згадваецца ў пачатку XVI стагоддзя. У Шклове захаваліся помнікі гісторыі і архітэктуры. Найбольш вядомая ратуша, пабудаваная ў канцы XVIII стагоддзя. Адным з сімвалаў горада з’яўляецца помнік агурку, устаноўлены ў 2007 годзе.