05.05.2021

Гарадскі велапрабег пройдзе ў Магілёве 8 мая

Гарадскі велапрабег «Веласіпедная вясна. Магілёў-2021. Пераможная» пройдзе ў абласным цэнтры 8 мая. Пра гэта паведамілі ў аддзеле спорту і турызму Магілёўскага гарвыканкама.

Удзельнічаць у велапрабегу можна камандай прадпрыемства або арганізацыі, а таксама сям’ёй. Як адзначылі арганізатары, любы веласіпедыст зможа адолець гэты маршрут – хуткасць калоны не будзе перавышаць 10 км/ч. Арганізаваная калона байкераў у суправаджэнні ДАІ стартуе ад плошчы Леніна, праедзе па праспекце Міру, вуліцы Каралёва, праспекце Дзімітрава, Віцебскім праспекце і фінішуе на турыстычнай паляне ў вёсцы Канстанцінаўка Магілёўскага раёна.

На турыстычнай паляне пройдуць спартыўныя спаборніцтвы: сямейнае велаарыентаванне, фігурнае кіраванне веласіпедам, трыял, апхіл, дзіцячая гонка і многае іншае.

Старт велапрабегу ў 11.00.

Магілёўскі абласны выканаўчы камітэт