08.12.2020

Гарадскі фестываль маладзёжнай творчасці праходзіць у Магілёве анлайн

Штогадовы гарадскі фестываль маладзёжнай творчасці «Усе таленты табе, мой Магілёў!» праходзіць у абласным цэнтры анлайн. Такое рашэнне арганізатары прынялі ў сувязі з эпідэміялагічнай сітуацыяй. Пра гэта паведамілі ў аддзеле ідэалагічнай работы і па справах моладзі Магілёўскага гарвыканкама.

Удзельнікамі фестывалю могуць стаць калектывы і салісты, дуэты, клубныя фарміраванні арганізацый культуры і аб’яднанняў па інтарэсах устаноў агульнай сярэдняй, прафесійна-тэхнічнай, сярэдняй спецыяльнай, вышэйшай і дадатковай адукацыі дзяцей і моладзі. Узрост удзельнікаў – ад 14 гадоў да 31 года.

Фестываль праходзіць у намінацыях: «Саліст-вакаліст», «Вакальны ансамбль», «Эстрадны танец», «Сучасная харэаграфія», «Тэатр», «Арыгінальны жанр» (пясочнае, вогненнае шоу, нумары, якія прадстаўляюць маладзёжныя субкультуры), «Цыркавы нумар».

Конкурс праводзіцца з 23 лістапада па 23 снежня ў адзін этап. Для ўдзелу неабходна да 20 снежня 2020 года даслаць на электронную пошту gkmogilev@tut.by заяўку на ўдзел устаноўленага ўзору і запіс выканання творчага нумара. Відэа неабходна дасылаць у фармаце .mpeg4, .mp4, .avi. Запіс не павінны ўтрымліваць мантаж і спецэфекты. Здымка павінна быць выканана ад пачатку да канца (без нарэзкі, удзельнік высылае запіс жывога выступу), у добрай якасці, без акустычных правалаў і з чыстым гукам, дапускаецца непрафесійнае відэа, запісанае на мабільны тэлефон або планшэт. Музычны інструмент, рукі і твар выканаўцы павінны быць добра бачныя. Для намінацый «Харэаграфія», «Тэатр», «Арыгінальны жанр» відэа павінна быць запісана агульным планам, каб быў бачны малюнак, кампазіцыя нумара.

Арганізатарамі конкурсу выступаюць аддзел ідэалагічнай работы і па справах моладзі Магілёўскага гарвыканкама, Магілёўскі гаркам БРСМ.