13.03.2023

Фестываль жаночых ідэй і праектаў пройдзе ў Магілёве

Фестываль для бізнесвумэн пройдзе 19 сакавіка. Арганізатарамі выступілі Магілёўскае агенцтва рэгіянальнага развіцця і жаночая бізнес-супольнасць.

Заснавальніца ўстановы «Жаночы дом» Крысціна Гладчанка ў ліку арганізатараў мерапрыемства:

- Сёння жанчыны хочуць рэалізоўвацца, але часта ў іх няма вопыту, нярэдка яны трапляюць у фінансавыя пасткі крэдытаў. Для жанчын вельмі важная маральна-псіхалагічная падтрымка. Таму мы вырашылі арганізаваць прастору і магчымасці, каб навучыць іх эфектыўна весці бізнэс. Мы дапамагаем выбудоўваць бізнес-стратэгію, свой брэнд. Мы вучым жанчын весці бізнес экалагічна, каб не разбураліся сем'і, вытрымліваць баланс паміж прадпрымальніцтвам і сямейнымі клопатамі. Мы самі шматдзетныя маці, таму добра разумеем, што жанчыну трэба вучыць не толькі працаваць, але і адпачываць. Мы ўжо правялі два вялікія жаночыя бізнес-форумы агульнай колькасцю 170 чалавек. Сёлета плануем правесці ўжо трэці па ліку форум для прадпрымальных прадстаўніц прыгожага полу. Адна вучаніца «Жаночага дома» збіраецца правесці вялікую канферэнцыю на тэму здароўя, дзве дзяўчыны плануюць адчыняць цэнтр танцаў і цэнтр здароўя: мы дапамагаем ім у прасоўванні праектаў.

Спікерамі на фестывалі жаночых ідэй выступяць спецыялісты Магілёўскага агенцтва рэгіянальнага развіцця, Цэнтра фінансавай пісьменнасці, установы «Жаночы дом», спецыяліст па прафарыентацыі, прадстаўнік банка.

Чакаецца, што будзе прапанавана 10 праектаў. Удзельніцы фестывалю змогуць прэзентаваць свой праект. Ацэньваць ідэю будуць члены журы, у склад якога ўвойдуць бізнесмены і кіраўнікі прадпрыемстваў. Час выступлення для прэзентацыі ідэй - да 5 хвілін. Пасля гэтага сваю працу пачнуць прадстаўнікі журы: яны абяруць лепшыя ідэі. Завершыцца фестываль круглымі сталамі. Кожнай з жанчын, якая прэзентавала сваю ідэю, вопытныя бізнесмены дапамогуць парадамі па рэалізацыі праекта.