28.02.2020

Фестываль творчасці замежных студэнтаў «Дружба народаў» пройдзе ў Магілёве

У беларуска-расійскім універсітэце сёння стартуе XIII фестываль творчасці замежных студэнтаў «Дружба народаў». Пра гэта паведамілі ў навучальнай установе.

Маладыя людзі з ВНУ Беларусі будуць спаборнічаць у конкурснай праграме мерапрыемства ў вакальна-харавой, інструментальнай і вакальна-інструментальнай творчасці, харэаграфічным і тэатральным мастацтве. Фінальным акордам фестывалю стане гала-канцэрт найлепшых калектываў і выканаўцаў і ўзнагароджанне пераможцаў.

Фестываль праводзіцца на базе ўніверсітэта з 2008 года. Яго асноўная мэта – устанаўленне новых творчых кантактаў паміж моладдзю розных краін, нацыянальнасцей, распаўсюджванне і адраджэнне нацыянальных традыцый, паразуменне паміж прадстаўнікамі розных народаў. Сёлета геаграфія фестывалю будзе прадстаўлена студэнтамі з Туркменістана, Камеруна, Азербайджана, Кітая, Шры-Ланкі, Судана, Ірака, Лівана, Егіпта, Узбекістана, Казахстана, Таджыкістана.

Непасрэдна ў БРУ падрыхтоўка замежных студэнтаў ажыццяўляецца з 1985 года. «Ужо традыцыйнае мерапрыемства збліжае тых, хто прыехаў да нас вучыцца, – падкрэслілі ў ВНУ. – Зносіны ў нефармальнай абстаноўцы дазваляюць дзецям лепш даведацца адзін пра аднаго, спазнаць і палюбіць культуру, мову, звычаі іншых краін. З кожным годам расце не толькі колькасць канкурсантаў, але і іх сцэнічнае майстэрства. За час фестывалю нам давялося ўбачыць шмат таленавітых і цікавых прадстаўнікоў розных народаў».