10.10.2025

Фестываль "Глушанскі хутарок" збярэ майстроў і гледачоў у Бабруйскім раёне

Рэгіянальны фестываль народнай творчасці і рамёстваў "Глушанскі хутарок" пройдзе 11 кастрычніка ў пасёлку Глуша Бабруйскага раёна. Аб гэтым карэспандэнту БЕЛТА расказала дырэктар ДУК "Цэнтралізаванай клубнай сістэмы Бабруйскага раёна" Марыя Лаўрыновіч.

Мерапрыемства пройдзе ў Цэнтры рамёстваў пасёлка Глуша ў 11.00. Як адзначыла Марыя Лаўрыновіч, фестываль ужо 17-ы раз стане пляцоўкай для абмену вопытам, дэманстрацыі народных традыцый і свята беларускай культуры.

"Сюды з'язджаюцца майстры народнай творчасці, рамеснікі, вакальныя калектывы з усёй Магілёўскай вобласці", - падкрэсліла яна.

На фестывалі пройдуць конкурсы "Вяртанне да вытокаў" - тэатралізаваная прэзентацыя абрадаў, "Хутарскія забавы" - гульнявыя праграмы клубных фарміраванняў, "Гаспадыня Глушанскага хутарка - 2025", пленэр па кераміцы і ганчарстве, выстаўка нацыянальнай кухні "Пiкнiк па-беларуску" і інш.

На фестывалі таксама пройдзе канцэртная праграма з удзелам творчых калектываў устаноў культуры раёна і гасцей фестывалю, выстаўка-кірмаш сельскагаспадарчай прадукцыі, гандлёвыя рады майстроў, іншыя забаўляльныя мерапрыемствы. Гледачы змогуць назіраць за стварэннем вырабаў з гліны, удзельнічаць у майстар-класах і дэгуставаць стравы па старадаўніх рэцэптах.

"Цікавасць да фестывалю расце з кожным годам - яго наведваюць не толькі мясцовыя жыхары, але і госці з Бабруйска, Глуска, Кіраўска і іншых населеных пунктаў", - расказала Марыя Лаўрыновіч.

Завершыцца "Глушанскі хутарок - 2025" цырымоніяй узнагароджання пераможцаў конкурсаў.

БелТА