17.08.2021

Дзяржзаказ па збожжы выкананы ў Магілёўскай вобласці больш чым на 80%

Дзяржзаказ па харчовым збожжы выкананы ў Магілёўскай вобласці больш чым на 80%. Пра гэта паведаміла начальнік аддзела раслінаводства камітэта па сельскай гаспадарцы і харчаванні Магілёўскага аблвыканкама Лілія Гулінская.

«У кошт дзяржзаказу гаспадаркамі рэгіёна на сёння пастаўлена 106,1 тыс. т харчовага збожжа, або 81% ад плана, – адзначыла Лілія Гулінская. – Дзяржзаказ на піваварны ячмень выкананы на 49%, што складае 4,9 тыс. т. Усяго па дзяржзаказе вобласць павінна здаць 140 тыс. т збожжа і ячменю. Асноўнымі нарыхтоўшчыкамі ў рэгіёне сталі Бабруйскі і Клімавіцкі камбінаты хлебапрадуктаў».

На сёння амаль выканалі дзяржзаказ чатыры раёны: Кіраўскі – на 96%, Горацкі – 94%, Мсціслаўскі і Шклоўскі – па 92%. Кожны з іх павінен здаць больш за 10 тыс. т.

Паводле апошніх звестак, збожжавыя і зернебабовыя культуры прыбраны ў Магілёўскай вобласці на тэрыторыі 248,7 тыс. га (83% ад запланаванай плошчы). Намалочана 742,8 тыс. т збожжа пры сярэдняй ураджайнасці 29,9 ц/га.

Магілёўскі абласны выканаўчы камітэт