24.06.2025

Дзіцячы мастацкі пленэр "Фарбы Магілёва" стартуе ў абласным цэнтры

Дзіцячы мастацкі пленэр "Фарбы Магілёва", прысвечаны 80-годдзю Перамогі савецкага народа ў Вялікай Айчыннай вайне, стартуе 24 чэрвеня ў абласным цэнтры. Аб гэтым БЕЛТА расказалі ў Магілёўскім гарвыканкаме.

Удзельнікі тэматычнага пленэру - навучэнцы і выкладчыкі дзіцячых школ мастацтваў Магілёва, а таксама госці з Ульянаўскай вобласці, Пензы, Астрахані, Смаленска. Пленэр будзе праходзіць па 29 чэрвеня.

За гэты час юныя мастакі намалююць на сваіх палотнах знакавыя месцы горада: плошчу Славы, Алею Герояў, вуліцу Ленінскую, плошчу Зорак, драмтэатр, парк у Падніколлі, храмы і іншыя знакавыя месцы. Праграма ўключае наведванне Магілёўскай ДШМ нумар 6, дзе адбудзецца майстар-клас па роспісе керамічнай цацкі "Леў - сімвал Магілёва". У выставачнай зале Музея гісторыі Магілёва ўдзельнікі сустрэнуцца з народным мастаком Расійскай Федэрацыі, акадэмікам Расійскай акадэміі мастацтваў Пятром Стронскім.

Пазней на адкрытай прасторы за будынкам абласнога краязнаўчага музея імя Е.Р. Раманава пройдзе яшчэ адзін майстар-клас - "Магілёў на палотнах расійскіх мастакоў". Пляцоўкай для круглага стала з удзелам педагагічных работнікаў "Метады развіцця і рэалізацыі творчага патэнцыялу навучэнцаў у галіне выяўленчага і дэкаратыўна-прыкладнога мастацтва ў дзіцячых школах мастацтваў" стане Магілёўская ДШМ нумар 7.

Інтэрактыўную праграму - падарожжа ў часе "Магілёў вачыма юных мастакоў" - арганізуюць у дзіцячай бібліятэцы-філіяле імя А.С. Пушкіна. А завершыць творчае мерапрыемства выстава работ удзельнікаў пленэру з урачыстым уручэннем дыпломаў, падзяк, сувеніраў.

Адкрыццё выставы па выніках пленэру адбудзецца 28 чэрвеня ў 14.00 у выставачнай зале Магілёўскай дзіцячай школы выяўленчых мастацтваў па вул. Ленінскай, 34.

БелТА