14.08.2020

Аграрыі Магілёўскай вобласці прыступілі да сяўбы азімага рапсу

– Сельгаспрадпрыемствы Магілёўскай вобласці прыступілі да сяўбы азімага рапсу, – паведамілі ў камітэце па сельскай гаспадарцы і харчаванні аблвыканкама.

Усяго, паводле даных на сёння, у рэгіёне засеялі крыху больш за 2 тыс. га. – гэта 3% ад запланаваных аб’ёмаў – пад рапс у вобласці выдзелена каля 60 тыс. га. Завяршыць пасеў плануюць да 20 жніўня.

Таксама ў Магілёўскай вобласці ідзе церабленне лёну. Такія работы праведзены на 5,3 тыс. га, што складае 66% уборачнай плошчы.

У рэгіёне намалацілі больш за 706 тыс. т збожжа і зернебабовых. Паводле звестак на раніцу 13 жніўня, ураджай прыбраны з 66% плошчаў. Сярэдняя ўраджайнасць склала 34 ц/га. Па намалоце лідзіруюць Магілёўскі (85,1 тыс. т), Шклоўскі (75,3 тыс. т), Горацкі (66,5 тыс. т) раёны.

Па ўраджайнасці ў ліку першых – Шклоўскі (46 ц/га), Круглянскі (41,1 ц/га), Магілёўскі, Горацкі, Кіраўскі (40 ц/га) раёны.