Сустрэча з казачнымі персанажамі, гульні і актыўнасці на свежым паветры: навучэнцы і выкладчыкі Магілёўскага дзяржаўнага ордэна Працоўнага Чырвонага Сцяга агралесатэхнічнага каледжа імя К.П.Арлоўскага падрыхтавалі для маленькіх магіляўчан і гасцей горада навагоднія ранішнікі. Святы будуць праходзіць на тэрыторыі заасада. Пра гэта расказала намеснік дырэктара па вучэбна-выхаваўчай рабоце ўстановы адукацыі Вікторыя Пуцькова.
«Навагоднія ранішнікі ў нашай навучальнай лабараторыі «Заасад» - добрая святочная традыцыя. Кожны год нашыя навучэнцы разам з педагогамі рыхтуюць сцэнары, прыдумляюць касцюмы і гульні для маленькіх гасцей. Прыемна адзначыць, што нашым хлопцам вельмі падабаецца як працэс падрыхтоўкі, так і ўдзел у саміх ранішніках, - расказала яна. - У нас няма прафесійных акцёраў, але кожны з удзельнікаў імкнецца зрабіць сваю ролю максімальна яркай. Нашы маленькія госці заўсёды застаюцца ў захапленні».
Сустрэча з казачнымі персанажамі, карагоды вакол навагодняй ёлкі і абавязкова - гульні, квэсты і актыўнасці. «Нашыя святы заўжды праходзяць на свежым паветры. У гэтым годзе снежань падарыў нам шмат снегу, а мы ўпрыгожылі тэрыторыю, дзе праходзяць ранішнікі. А таму святочная, навагодняя атмасфера атрымалася на ўсе 100%, - падзялілася Вікторыя Пуцькова. - Сёлета нашы маленькія наведвальнікі змогуць сустрэцца са Снежнай каралевай, Мачахай і Падчарыцай, Бабай Ягой і Кастылем Іванавічам. І, вядома ж, свята не абыдзецца без Дзеда Мароза і Снягуркі. Гульнявая праграма разлічана да 60 хвілін».
Наведаць ранішнік у заасадзе можна па папярэднім запісе ў складзе групы ад 20 да 45 чалавек. Праходзяць ранішнікі ў 13.00, 14.00, 15.00 і 16.00.
Вялікая ўвага ў падрыхтоўцы і арганізацыі дзіцячых ранішнікаў надае і кіраўнік установы адукацыіМіхаіл Сасонка. «Навагодняя пара - гэта час цудаў і здзяйснення жаданняў. Каб падарыць настрой і яркія ўспаміны дзецям, якія маюць сур'ёзныя захворванні або асаблівасці развіцця, у нас кожны аўторак арганізавана дабрачынная акцыя. У гэты дзень хлопцы і іх суправаджаючыя могуць прыехаць да нас бясплатна», - адзначыў ён.
Апроч навагодняй праграмы, усе ўдзельнікі ранішніка пасля яго завяршэння могуць пагуляць па заасадзе і пазнаёміцца з яго насельнікамі. Тым больш, сёлета тут з'явіліся новыя жывёлы: тыгр, пума, насухі і цэлы комплекс з акварыўмнымі рыбкамі.
«Кожны год да нас прыязджае шмат гасцей. І мы заўсёды імкнемся зрабіць іх адпачынак цікавым і разнастайным. Заасад пастаянна развіваецца, з'яўляюцца новыя жывёлы, ідзе добраўпарадкаванне тэрыторыі, яе афармленне разнастайнымі ўпрыгожваннямі і малымі архітэктурнымі формамі, - расказаў Міхаіл Сасонка. - І навагодняя праграма не перастае быць запатрабаванай. Да нас з радасцю едуць дзеці і іх бацькі са ўсёй вобласці і не толькі».
Навучальная лабараторыя "Заасад" Магілёўскага агралесатэхнічнага каледжа - адна з разыначак Магілёва. Толькі сёлета яе наведалі больш за 300 тыс. чалавек.
